Urwego rw’Igihugu rw’Ubugenzacyaha (RIB) rwataye muri yombi Habiyaremye Zacharie, wamenyekanye cyane ku izina rya Bishop Gafaranga, akurikiranyweho ibyaha bifitanye isano n’ihohotera rishingiye ku gitsina.
Amakuru y’itabwa muri yombi ry’uyu mugabo yemejwe n’Umuvugizi wa RIB, Dr. Murangira B. Thierry, wavuze ko yafashwe ku wa Kabiri, tariki ya 7 Gicurasi 2025, kandi ko afungiye kuri sitasiyo ya RIB ya Nyamata mu gihe iperereza rigikomeje.
Dr. Murangira yagize ati: “Ni byo koko ku wa 7 Gicurasi 2025, RIB yafunze Bishop Gafaranga ubusanzwe witwa Habiyaremye Zacharie, akurikiranyweho ibyaha by’ihohoterwa rishingiye ku gitsina. Ubu afungiye kuri sitasiyo ya RIB ya Nyamata mu gihe iperereza rigikomeje.”
Nubwo RIB yemeje ko Bishop Gafaranga afunzwe, ntabwo yatangaje amakuru arambuye ku byerekeranye n’uwo yaba yarakoreye iryo hohotera cyangwa igihe n’aho byaba byarabereye, ku bw’impamvu z’iperereza rigikomeje.
Habiyaremye Zacharie, uzwi nka Bishop Gafaranga, ni umwe mu bantu bakunze kumvikana cyane mu itangazamakuru no ku mbuga nkoranyambaga, ahanini azwiho amagambo akomeye ndetse n’imyitwarire itavugwaho rumwe. Yakunze kwiyita intumwa y’Imana, ariko uburyo bwe bwo kubwiriza n’imvugo ze zateye impaka nyinshi mu baturage ndetse no mu nzego zinyuranye.
Iri fatwa rye rije rikurikira ibihe byari bimaze iminsi byaranzwe n’inkuru zivugwa ku bantu bitwaza imyemerere cyangwa imyanya y’ubuyobozi bw’iyobokamana kugira ngo bagire abo bahohotera cyangwa bakabambura ibyabo, ndetse n’ihohoterwa rishingiye ku gitsina. Ni ikibazo gikomeje kugarukwaho kenshi mu itangazamakuru no mu miryango iharanira uburenganzira bwa muntu.
RIB ihora isaba Abanyarwanda gukomeza gutanga amakuru ku gihe ku byaha nk’ibi kugira ngo ubutabera bukore akazi kabwo neza kandi habungabungwe umutekano n’uburenganzira bwa buri wese, by’umwihariko bw’abagore n’abana bakunze guhura n’ihohoterwa.
