Imirwano hagati y’inyeshyamba z’umutwe wa AFC/M23 n’iza Wazalendo yongeye kwaduka mu gitondo cyo kuri uyu wa Gatatu, tariki ya 28 Gicurasi 2025, mu gace ka Kalonde kari muri Teritwari ya Walikale, mu Ntara ya Kivu y’Amajyaruguru
Iyi mirwano yabereye mu duce twa Banamulema, muri Gurupoma ya Kisimba, nyuma y’uko abarwanyi ba Wazalendo bagabye igitero ku gace ka Ngerere, kari mu maboko ya M23 kuva ku wa Mbere w’iki cyumweru.
Nk’uko byatangajwe n’ikinyamakuru ACTUALITE.CD, gitangaza amakuru y’ako karere, abantu b’aho batangaje ko igice kinini cya Rushihe, kiri hagati ya Katobo na Mbukuru, cyamaze gufatwa n’abarwanyi ba Wazalendo nyuma y’imirwano yabaye mu gitondo.
Abayobozi bo mu nzego z’ibanze ndetse n’abashinzwe umutekano bo muri Walikale bemeje aya makuru, bavuga ko imirwano ikomeje kwegera agace ka Rusamambu, aho abahatuye bavuga ko bumva amasasu y’imbunda nini n’intoya, ava mu ntera y’ibilometero bine uvuye aho batuye.
Abarwanyi ba Wazalendo, bashyigikiwe na Leta ya Congo (RDC), barimo kugerageza kwisubiza uduce twa Rusamambu, Bukumbirwa, Kishonjia, na Kilambo, two muri Gurupoma ya Ikobo, nyuma y’uko byari byafashwe na M23 mu minsi ishize.
Iyi mirwano ije kongera ubukana mu bibazo bimaze igihe bivugwa mu Burasirazuba bwa Repubulika Iharanira Demokarasi ya Congo, aho imitwe yitwaje intwaro ihora ihanganye n’ingabo za Leta n’indi mitwe ishyigikiwe nayo.
