Mu mikurire y’umwana, kuvuga ni kimwe mu bigize intambwe zikomeye. Kugira ngo umwana avuge neza, si ukwitega ko rimwe na rimwe azafata ijambo ngo arivuge gusa, ahubwo ni urugendo rurerure ruba rusaba uruhare rukomeye rw’ababyeyi n’abandi bamuba hafi. Iyo usanzwe uri umubyeyi cyangwa ufite inshuti ifite umwana muto, iyi nkuru yagirira akamaro.
Kwiga kuvuga ni ugukura mu mitekerereze no kumenya uko Isi iteye. Ni uko umwana amenya gutanga ibitekerezo, kugaragaza amarangamutima ye no kwakira ibyo abandi bamubwira. Iyo umubyeyi avugana n’umwana, aba amwigishije gukunda ururimi no kurukoresha mu buryo bwagutse.
Ijwi ryawe nk’umubyeyi rifite imbaraga zidasanzwe ku mwana. Araryumva, ararikunda kandi rimumarira byinshi. Si amagambo gusa umuha, ahubwo unamuha urukundo, ituze n’ubumenyi. Vugisha umwana wawe buri munsi: musangire ibiganiro ku byo mubona, ibyo murimo, ibyo yanyuzemo ku munsi. Ibyo biganiro bisanzwe ni nk’imbuto ziterwa mu mutima w’umwana, zizamera bitewe n’uko wazitayeho.
Ni byiza gukoresha amagambo make, yumvikana kandi yoroshye. Aho kumuvugisha amagambo y’ingorabahizi, shyiraho ingero zoroshye nko kuvuga uti: “dore igiti,” “reka dufungure,” “turye,” “fata iri jambo.” Ibi bintu bisanzwe bifasha umwana gusobanukirwa amagambo no kuyasubiramo uko iminsi ishira.
Iyo umwana agerageje kuvuga, n’ubwo yaba avuga nabi cyangwa agashyiramo urundi rurimi, fata ako kanya nk’ak’igiciro. Niba yavugiye ijambo “aka,” wamusubiza uti: “urashaka aka gakapu?” Uko ugarura iryo jambo mu buryo nyabwo, ni ko umwana arushaho kurifata neza.
Ushobora kumusomera inkuru, imivugo cyangwa ukamuririmbira indirimbo z’abana. Ibyo bikorwa biba nk’ishuri ritagira amapine cyangwa intebe, ariko rikigisha byinshi. Umwana arumva, akishima, akaririmba, agaseka… n’ayo magambo akinjira atyo mu bwonko no mu mutima we.
Ntukamuvugire cyangwa ngo umukosore cyane igihe ashaka kuvuga. Mwihanganire, umuhe umwanya, kuko uko rimugora uyu munsi ni ko azarifata nk’irifite agaciro. Yemerere kuvuga uko abishoboye, kuko ari ko kuri kwe, kandi uko agenda akura niko ururimi rwe ruba rurushaho gukomera.
Ariko niba umwana afite imyaka myinshi ariko amagambo ye adatera imbere, niba atagira icyo avuga cyangwa atitaba iyo uvuganye na we, byaba byiza kugisha inama. Hari inzobere mu kuvugisha abana (orthophonistes) n’abigisha imyitwarire y’abana, bashobora kumufasha kwiteza imbere.
Mu by’ukuri, kuvugisha umwana ni nko kumwubakamo inzu y’ururimi. Ni urugendo rusaba urukundo, kwitanga no kwihangana. Iyo ufashe iya mbere, umwana nawe agenda yegera ururimi, arukunda, akarukoresha, kandi akarugira igikoresho cy’ubuzima bwe bwa buri munsi.
