Xabi Alonso yagizwe umutoza wa Real Madrid mu gihe cy’imyaka itatu, asimbuye Carlo Ancelotti werekeje mu Ikipe y’Igihugu ya Brésil.
Iyi kipe yatangaje ko aya masezerano azatangira tariki ya 1 Kamena 2025 kugeza ku ya 20 Kamena 2028.
Alonso yerekeje muri Real Madrid nyuma yo gutandukana na Bayer Leverkusen yahesheje Igikombe cya Shampiyona y’u Budage, Igikombe cy’Igihugu ndetse Super Coupe mu myaka itatu gusa.
Uyu Munya-Espagne kandi asubiye muri Real Madrid yakiniye imikino 236 hagati ya 2009 na 2014. Yatwaranye na yo UEFA Champions League mu 2014, Igikombe cya Shampiyona inshuro imwe, Ibikombe by’Umwami bibiri ndetse na Super Coupe ya Espagne imwe.
Alonso kandi yatangiriye umwuga w’ubutoza mu makipe y’abato ya Real Madrid, aho mu mwaka w’imikino wa 2018/19 yahesheje iy’abatarengeje imyaka 14 Igikombe cya Shampiyona.
Icyakora, uyu mugabo afite akazi gakomeye ko kuzahura iyi kipe kuko yagize umwaka mubi cyane w’imikino, aho nta gikombe yegukanye.
Si ibyo gusa kuko yanatandukanye n’abakinnyi bari bayimazemo igihe kinini nka Luka Modrić, Lucas Vázquez n’abandi.
