Nyuma y’amezi yari amaze atoza ikipe ya Rayon Sports, Umutoza w’Umunya-Brésil Roberto Oliveira Gonçalves do Carmo, uzwi cyane nka Robertinho, yahisemo kwitabaza Ishyirahamwe ry’Umupira w’Amaguru mu Rwanda (FERWAFA), arega iyi kipe ayishinja kutubahiriza amasezerano y’akazi.
Iki kirego cyatanzwe nyuma y’uko ku wa 14 Mata 2025, Ubuyobozi bwa Rayon Sports bwamuhagaritse ku mirimo ye y’ubutoza, hamwe n’Umutoza w’Abanyezamu Mazimpaka André, impamvu y’ingenzi yatangajwe icyo gihe ikaba yari umusaruro muke w’ikipe.
Nyuma y’aho, habaye impaka ndende ku by’ukuri kw’ihagarikwa rye, aho Rayon Sports yatangaje ko yahagaritse Robertinho kubera uburwayi bw’amaso. Gusa we ntiyigeze yemeranya n’iyi mpamvu, ayita urwitwazo rw’ugushaka kumwirukana ku buryo bunyuranyije n’amategeko.
Nk’uko amakuru abivuga, Robertinho yamaze gutanga ikirego muri Komisiyo Ishinzwe Gukemura Amakimbirane muri FERWAFA, aho asaba ko Rayon Sports yamwishyura amafaranga angana na 20,000$ (agera hafi kuri miliyoni 25 Frw), avuga ko ari ibirarane by’amezi ane atigeze ahemberwa.
Uyu mutoza, wabaye icyamamare mu mupira w’amaguru muri Brazil mbere yo kuba umutoza, ashimangira ko yafashwe nabi n’ubuyobozi bwa Rayon Sports, bukamwirukana butamugiriye inama cyangwa ngo buhitemo inzira y’ubwumvikane.
Nubwo iyi kipe itozwa na Robertinho yahagaritse amasezerano ye, iracyari ku mwanya wa mbere ku rutonde rw’agateganyo rwa shampiyona y’icyiciro cya mbere mu Rwanda, aho ifite amanota 59. Itegerejwe gusura Bugesera FC ku wa 17 Gicurasi 2025, mu mukino w’umunsi wa 28 wa shampiyona.
Kugeza ubu, ubuyobozi bwa Rayon Sports ntiburagira icyo butangaza ku by’iki kirego, cyangwa niba hari gahunda yo kumvikana n’uyu mutoza mbere y’uko Komisiyo ibifataho umwanzuro.
