Umuraperi Scott Mescudi wamenyekanye ku izina rya Kid Cudi, aherutse gutanga ubuhamya mu rubanza rwa P.Diddy amushinja byinshi birimo nko kuba yaratwitse imodoka ye, ariko abamwunganira mu mategeko basabye ko ubu buhamya buteshwa agaciro.
Iby’umubano mubi hagati ya Sean Combs uzwi nka P.Diddy n’umuraperi Kid Cudi byatangiye kuvugwa mu 2012, ndetse binatangazwa ko Diddy yaturikije imodoka ye. Icyakoze icyo bapfaga ntabwo cyari kizwi.
Ku wa 12 Gicurasi 2025 ubwo umuhanzikazi Cassie Ventura wahoze ari umukunzi wa Diddy yatangaga ubuhamya mu rukiko, yavuze ko uyu mugabo yakunze kumubwira ko azahemukira Kid Cudi kandi ko azatwika imodoka ye.
Iki gihe Cassie yavugaga ko ibi Diddy yabimubwiye mu 2011 ubwo yamenyaga ko we na Kid Cudi bakundanyeho by’igihe gito.
Yavuze ko mu 2011 yamaze amezi ane yarashwanye na Diddy ariko bataratandukana burundu. Muri icyo gihe ni bwo ngo yacuditse na Kid Cudi ndetse bakagira umubano wabo ibanga, aho bajyaga bahurira muri za hoteli n’ijoro.
Nyuma yaho uyu mubano wabo ntiwarambye kuko Cassie yahise yiyunga na Diddy barasubirana, ari na bwo yahise amenya ko Kid Cudi yari amaze iminsi yishimishanya na we.
Uyu muhanzikazi yavuze ko Diddy yarakaye agahita amubwira ko azahemukira Cudi, aho yamubwiye ko agiye kuzamutwikira imodoka afite ihenze.
Ibi byaje kwemezwa na Kid Cudi mu buhamya yatanze mu rukiko ku wa 22 Gicurasi 2025, aho yavuze ko Diddy ari we wihishe inyuma y’iturika ry’imodoka ye ya ‘Porsche’ ryabaye mu 2012.
Uyu muraperi yabwiye urukiko ko mbere y’uko imodoka ye iturika, Cassie yari yabanje kumubwira ko Diddy ashaka kuzayitwika gusa ntabifate nk’ukuri kuko yumvaga bidashoboka.
Ubwo yaturikaga, ngo ni bwo yahise yibuka umuburo Cassie yari yamuhaye.
Mu bindi byinshi Kid Cudi yabwiye urukiko harimo kuba Diddy yarakunze kumutera ubwoba ndetse ko yigeze no gutera urugo rwe nijoro agamije kumukubita. Ibi byose ngo yabikoraga amuziza ko yakundanyeho na Cassie.
Kuri ubu abunganira Diddy basabye ko ubuhamya bwa Kid Cudi buvanwa mu rukiko.
Bavuze ko ibyo Kid Cudi yavuze ibyo bintu nta bimenyetso bifatika afite, ko abishingira gusa ku byo yumva cyangwa yibwira. Bongeyeho ko ibyo yavuze bishobora gutuma abantu babogama kandi ko binabangamira urubanza.
Ni mu gihe urubanza rwa Diddy rugikomeje aho ruteganyijwe kumara amezi atandatu, naho we afungiye muri gereza ya Brooklyn kuva muri Nzeri ya 2024.
Uyu muhanzi akurikiranyweho ibyaha birimo gufata ku ngufu, gucuruza abakobwa no gushora abantu mu bikorwa by’ubusambanyi.
