Ikipe ya Chelsea yo mu Bwongereza yegukanye Igikombe cya UEFA Conference League itsinze Real Betis yo muri Espagne ibitego 4-1 ku mukino wa nyuma wabaye kuri uyu wa Gatatu, ikora amateka yo kuba ikipe ya mbere itwaye ibikombe mu marushanwa yose uko ari ane akinirwa i Burayi.
Ibitego bya Chelsea muri uyu mukino wa nyuma wabereye mu Mujyi wa Wroclaw muri Pologne, byatsinzwe na Enzo Fernandez, Nicolas Jackson, Jadon Sancho na Moises Caicedo mu gice cya kabiri.
Real Betis ni yo yari yafunguye amazamu ku gitego cyatsinzwe na Abde Ezzalzouli ku mupira wari uvuye kuri Isco ku munota wa cyenda.
Cyabaye igikombe cya mbere mu mwaka wa mbere ku mutoza wa Chelsea, Enzo Maresco, wayifashije gusoreza ku mwanya wa kane muri Premier League akinisha ikipe y’abakinnyi bato.
Umukino Chelsea yatsinzemo Nottingham Forest ku Cyumweru, hasozwa Premier League, washimangiye ko izakina UEFA Champions League mu mwaka w’imikino utaha.
Igikombe cya UEFA Conference League cyabaye icya karindwi cy’i Burayi cyegukanywe na Chelsea, aho cyiyongereye kuri Champions League ebyiri, Europa League ebyiri na UEFA Super Cup ebyiri.
Chelsea yabaye kandi ikipe ya mbere yegukanye amarushanwa yose uko ari ane akinwa n’amakipe i Burayi, ari yo UEFA Champions League, UEFA Europa League, UEFA Conference League na Super Cup.
