Kylian Mbappé yegukanye igihembo cy’umukinnyi watsinze ibitego byinshi muri Shampiyona zo ku Mugabane w’i Burayi, mu mwaka we wa mbere muri Real Madrid.
Uyu Mufaransa yatsinze ibitego 31 muri Shampiyona ya Espagne (La Liga) arusha Robert Lewandowski ibitego bine.
Icyakora, rutahizamu wa Sporting Lisbon, Viktor Gyökeres, we yatsinze ibitego 39, gusa Mbappé yamurushije amanota kubera shampiyona akinamo.
Mu gutoranya uyu mukinnyi, ibitego byo muri shampiyona eshanu za mbere bibarirwa amanota abiri. Ni ukuvuga Shampiyona y’u Bwongereza, Espagne, u Budage, u Butaliyani ndetse n’iy’u Bufaransa.
Ni mu gihe ku va ku mwanya wa gatandatu kugeza ku wa 22 ari naho iya Portugal iri, ihabwa inota n’igice.
Bivuze ko ibitego 31 Mbappé yatsinze bifite amanota 62 , mu gihe 39 bya Gyökeres bifite 58.5. Aba bombi bakurikiwe na Mohamed Salah, Robert Lewandowski na Harry Kane.
Mbappé yabaye umukinnyi wa gatatu wa Real Madrid wegukanye iki gihembo nyuma ya Hugo Sanchez wabikoze mu 1989/90 na Cristiano Ronaldo wacyegukanye inshuro eshatu mu 2010/11, 2013/14 na 2014/15.
