RS Berkane yo muri Maroque yegukanye irushanwa rya CAF Confederation Cup ku nshuro ya gatatu imaze gutsinda Simba SC yo muri Tanzania ibitego 3-1 mu mikino ibiri, kuko umukino ubanza iyi kipe yo muri Maroc yatsinze ibitego 2-0.
Muri Zanzibar, kuri iki Cyumweru, tariki ya 25 Gicurasi 2025, habereye umukino wa nyuma wo kwishyura w’irushanwa Nyafurika rya CAF Confderation Cup, aho Simba SC yari yakiriye umukino ndetse yawufashe nk’uwo gupfa no gukira, iza no kubona igitego cya mbere ku munota wa 17 gitsinzwe na Joshua Mutale.
Ku munota wa 36, Yusuph Kagoma yahawe ikarita y’umuhondo, ndetse iza kwiyongeraho indi yabonye ku munota wa 50, bibyara guhabwa ikarita itukura aho Simba SC yahise iba nk’ivuye mu mukino.
Stephen Mukwala yatsinze igitego cya kabiri cya Simba SC, ariko umusifuzi w’Umunya-Mauritania, Beida Dahane, yemeza ko habayemo kurarira nyuma yo kugenzura amashusho ya VAR.
Soumaila Sidibe wa RS Berkane yatsinze igitego cyo kunganya ku munota wa gatatu w’inyongera, ahita ahesha Igikombe cya CAF Confederation Cup iyi kipe yo muri Maroque.
Iki ni igikombe cya 3 cya CAF Confederation Cup RS Berkane yegukanye nyuma y’icyo yegukanye mu myaka ya 2020 na 2022.
