Tundu Lissu, Umuyobozi w’ishyaka ritavuga rumwe n’ubutegetsi CHADEMA, yatawe muri yombi na polisi ya Tanzania ku wa 9 Mata 2025, nyuma yo kwitabira inama mu karere ka Ruvuma mu majyepfo y’igihugu.
Ishyaka CHADEMA ryatangaje ko Lissu yafashwe nyuma gato yo kurangiza inama, hamwe n’abandi bayobozi bari bari kumwe. Polisi ntacyo yari yatangaza kuri iri tabwa muri yombi.
Amashusho yashyizwe ahagaragara agaragaza Lissu ashinja polisi kumubuza kuva aho inama yabereye, avuga ko bakorera inyungu z’ishyaka riri ku butegetsi, CCM.
Yagize ati: “Inama yagenze neza, ariko polisi irimo kumbuza kugenda. Niba ari uko bimeze, singenda, ndarara hano.”
Impirimbanyi z’uburenganzira bwa muntu zamaganye iri tabwa muri yombi, zishinja ubutegetsi gushaka gucecekesha abatavuga rumwe na bwo mbere y’amatora ateganyijwe muri Ukwakira 2025, ibyo leta ihakana.
Lissu amaze iminsi akorera inama atanga ubutumwa busaba impinduka mu kanama k’amatora, avuga ko kadakwiriye kugenzurwa na Perezida. Akomeje gusubiramo intero igira iti: “Nta mavugurura, nta matora.”
Lissu w’imyaka 57 amaze gufatwa na polisi kenshi, ndetse mu 2017 yarokotse igerageza ryo kumwivugana ubwo yaraswaga amasasu 16.
