Guverinoma y’u Rwanda yateye utwatsi amakuru yavugaga ko hari imbanzirizamushinga y’amasezerano y’amahoro yatangiye kuganirwaho hagati y’u Rwanda na Repubulika Iharanira Demokarasi ya Congo (RDC), nk’uko byari byitezwe ku wa 2 Gicurasi 2025.
Minisitiri w’Ububanyi n’Amahanga n’Ubutwererane, Amb. Olivier Nduhungirehe, yatangaje ibi mu rukerera rwo ku Cyumweru, tariki ya 4 Gicurasi 2025, asubiza ku makuru yatangajwe na TV5 Monde ko ngo hari imbanzirizamushinga yasinywe ku itariki ya 2 Gicurasi, ubwo hasinywaga amasezerano y’amahoro hagati y’impande zombi.
TV5 Monde yari yatangaje ko ku wa Gatanu, ba Minisitiri b’Ububanyi n’Amahanga ba RDC bongeye guhurira i Washington D.C., bagaragiwe n’ibihugu birimo u Bufaransa, Qatar, igihugu cyakiriye ibiganiro ndetse n’Umuryango wa Afurika Yunze Ubumwe (AU), biga kuri iyo mbanzirizamushinga y’amahoro.
Ariko Minisitiri Nduhungirehe yabihakanye yivuye inyuma, avuga ko nta biganiro byabayeho i Washington, ndetse ko we ubwe ndetse na mugenzi we wa RDC, Madamu Thérèse Kayikwamba Wagner, bari bari i Libreville muri Gabon, bitabiriye umuhango w’irahira rya Perezida Brice Clotaire Oligui Nguema washoje inshingano nk’Umukuru w’Igihugu w’inzibacyuho.
Yagize ati: “Kugeza n’ubu, nta mbanzirizamushinga y’amasezerano y’amahoro iri mu biganiro kuko impande zombi zitarahuriza ku bitekerezo by’ingenzi.”
Ku wa 25 Mata 2025, u Rwanda na RDC basinye amasezerano y’amahame agamije kugarura amahoro arambye, ku bufasha bwa Leta Zunze Ubumwe za Amerika. Aya masezerano yagombaga gutanga icyizere cyo gusubiza ituze mu Burasirazuba bwa RDC, anashimangira ibiganiro bya Luanda, Nairobi na Doha, byose birebererwa na AU.
Mu masezerano harimo ingingo zirebana no guhagarika imirwano, guhagarika gushyigikira imitwe yitwaje intwaro ndetse no kugera ku masezerano arambuye y’amahoro bitarenze tariki ya 2 Gicurasi 2025. Ariko kugeza ubu ibyo biganiro ntibiratangira.
Intambara hagati ya RDC n’inyeshyamba za M23, zifatanyije na AFC, ikomeje gufata intera, aho mu 2025 aba barwanyi bafashe imijyi ya Goma na Bukavu. Ibi byateje impunzi zisaga miliyoni ndetse abarenga 7,000 batakaza ubuzima.
Guverinoma ya RDC yo yakomeje gufatanya n’imitwe yitwaje intwaro irimo na FDLR — umutwe w’abagize uruhare muri Jenoside yakorewe Abatutsi mu 1994 — ndetse na Perezida wa RDC ubwe, yavuze ku mugaragaro umugambi wo gutera u Rwanda.
Ibimenyetso byari byamaze gushyirwaho byagaragazaga ko izo ntwaro zari ziteguye gukoreshwa, bigaragaza uburyo umwuka mubi hagati y’ibihugu byombi wari umaze gufata indi ntera.
