Umujyi wa Kigali wongeye kugaragara ku mwanya wa kabiri mu mijyi ya Afurika yakira inama n’ibikorwa mpuzamahanga, naho u Rwanda rushirwa ku mwanya wa gatatu mu bihugu bya Afurika byiza mu kwakira bene ibi bikorwa.
Ibi byatangajwe n’Ishyirahamwe Mpuzamahanga ry’Inama n’Amakoraniro (International Congress and Convention Association – ICCA).
Kigali imaze imyaka itanu yikurikiranya ishyirwa mu myanya y’imbere, ikomeza kwiyubakira izina nk’umujyi wizewe, ukundwa n’abategura inama ku rwego mpuzamahanga. Uyu mwanya Kigali igumaho ugaragaza icyizere ikomeje kugirirwa n’abashaka gukorera ibikorwa byabo muri Afurika.
Itangazo ryashyizwe hanze ku wa 27 Gicurasi 2025 n’Ikigo cy’u Rwanda gishinzwe guteza imbere ubukerarugendo bushingiye ku bikorwa (Rwanda Convention Bureau – RCB), ryemeje ko umwanya mwiza u Rwanda rufite ushingiye ku ntambwe yatewe mu bijyanye n’ubukerarugendo bushingiye ku kwakira inama (MICE – Meetings, Incentives, Conferences and Exhibitions).
Impamvu z’iterambere mu kwakira inama
RCB yagaragaje ibintu bitandukanye byatumye Kigali ihora mu myanya y’imbere birimo:
- Politiki y’ubwisanzure ku bijyanye na viza (visa ku butaka ku bantu bose binjira mu Rwanda),
- Gukomeza kwagura ingendo za RwandAir ku rwego mpuzamahanga,
- Ibikorwa remezo bigezweho Kigali ifite nko Kigali Convention Centre, BK Arena, Stade Amahoro, na Intare Conference Arena, byose bifite ubushobozi bwo kwakira ibikorwa binini mu buryo bugezweho kandi mu mutekano usesuye.
Imibare igaragaza iterambere
Mu 2024, u Rwanda rwakiriye abashyitsi barenga 52,000 bitabiriye inama n’amakoraniro atandukanye, bikinjiriza igihugu amadovize arenga $84.8 miliyoni. Abagera ku 17,000 muri bo bitabiriye inama mpuzamahanga zateguwe n’imiryango ikomeye nka:
- Inama rusange ya FIA,
- ICANN 80 Policy Forum,
- INGSA Conference,
- Africa Food Systems Forum, n’izindi.
Umuyobozi Mukuru wa RCB, Jane Karemera, yavuze ko iri terambere ari umusaruro w’ubufatanye bw’inzego zitandukanye. Yagize ati:
“Turishimira kubona Kigali n’u Rwanda bigenda byemerwa nk’ahantu h’icyitegererezo ho kwakirira inama. Ibi ni ibimenyetso byerekana icyizere n’ubunyamwuga dukomeje kubaka mu ruganda rwo kwakira ibikorwa mpuzamahanga.”
Mu gukomeza gutyaza ubumenyi bw’abakorera muri uru rwego, u Rwanda ruzakira umushinga wa ICCA Skills Hub mu 2025, aho hazatangirwa amahugurwa y’abanyamwuga mu kwakira inama, harimo:
- Certified International Convention Specialist (CICS) kuva tariki 15–17 Nyakanga,
- Certified International Convention Executive (CICE) kuva tariki 14–16 Ukwakira.
Icyerekezo cy’ubukerarugendo
Mu 2024, urwego rw’ubukerarugendo mu Rwanda rwinjije $647 miliyoni, nk’uko byatangajwe na Rwanda Development Board (RDB), bikaba biteganyijwe ko mu 2025 ayo madovize azagera kuri $700 miliyoni.
Ibi byose bishimangira ko u Rwanda, by’umwihariko Umujyi wa Kigali, bikomeje kwiyubaka nk’igicumbi cy’inama n’ibikorwa by’ubucuruzi ku rwego mpuzamahanga ku mugabane wa Afurika.
