Nk’uko byemejwe n’Urukiko rwa Nakawa muri Uganda, Dr. Kizza Besigye, Captain Denis Oola na Hajji Obeid Lutale, bose batavuga rumwe n’ubutegetsi bwa Uganda barakomeza gufungwa by’agateganyo, ku itariki ya 21 Gicurasi 2025 urubanza rwabo rwongere gusubukurwa.
Mu mpamvu Ubushinjacyaha bwatanze harimo kuba abunganizi b’abaregwa Babangamiye iperereza.
Ibyaha Dr. Besigye na bagenzi be bakurikiranweho birimo; iterabwoba, gushaka guhirika ubutegetsi no gukoresha intwaro hagati yo mu 2023 no mu Ugushyingo 2024.
Besigye yabanje kuganira n’abanyamategeko be barimo; Martha Karua na Eria S. Lukwago, mbere y’uko asubizwa muri gereza ya Luzira, nyuma na bo batangaza ko iri ari ihohoterwa riri gukorerwa abanya politiiki muri Uganda.
Umunyapolitiki Dr. Besigye amaze imyaka myinshi atavuga rumwe n’ubutegetsi bwa Uganda. Yatawe muri yombi i Nairobi muri Kenya mu Ugushyingo 2024, ubwo yari yagiye kwitabira imurikwa ry’igitabo cya mugenzi we, Martha Karua umwunganizi we mu mategeko.
Yaje gufungirwa muri gereza ya gisirikare biza guteza imidugararo maze umuryango we ugaragaza ko batumva ukuntu gufungirwa muri kasho za gisirikare uri umusivile bitumvikana.
Dr. Besigye yahise atangira imyigaragambyo yo kwiyicisha inzara bituma Guverinoma ya Uganda iva ku izima yemera kumufungira muri Gereza z’abasivile.
Akiri mu myigaragambyo yatangiye ku wa 10 Gashyantare 2025, yaje kugarurwa imbere y’Urukiko ariko bigaragara ko afite intege nke bituma muganga we amusaba ko yayihagarika mu gihe ategereje ko urubanza rwimurirwa mu rukiko rwa gisivile.
