Impuzamashyaka Burundi Bwa Bose yatangaje ko bafite impungenge ko amatora y’abagize inteko ishinga amategeko ateganijwe kuba mu mezi ari imbere atazaba kubera ibura ry’ibikomoka kuri peteroli rikomeje kugariza igihugu.
Mu itangazo ryashyizwe ahagaragara na Kefa Nibizi, Umunyamabanga Mukuru w’iyo mpuzamashyaka, yagaragaje ko ibura ry’igitoro rishobora kubangamira igikorwa cy’amatora, ashinja ubuyobozi kutabasha guhangana n’iki kibazo.
U Burundi bumaze imyaka irenga ibiri buhanganye n’ikibazo cy’ibikomoka kuri peteroli. Perezida Evariste Ndayishimiye ubwe yigeze kwemera ko iki kibazo ari kimwe mu bibangamiye iterambere ry’igihugu, anashinja sosiyete ya SOPEBU yahawe isoko ryo gucuruza ibikomoka kuri peteroli, kuba ariyo icuruza peteroli mu buryo bwa magendu bigatuma ku masitasiyo ibura.
Perezida Ndayishimiye aheruka gutangaza ko yatanze ruswa ya miliyoni 4 z’amafaranga y’amarundi muri SOPEBU kugira ngo abone lisansi ya litiro 10,000, yagombaga kugenerwa amasitasiyo asanzwe acuruza.
Nibizi yanenze ruswa n’inyerezwa ry’umutungo wa Leta, avuga ko ibyo biri mu byazambije ubukungu bw’u Burundi. Yavuze ko umutungo kamere w’igihugu, nk’amabuye y’agaciro, uri kwibwa, abayiba bagapfumbatisha abashinzwe ubutabera ku buryo nta bihano bifatika bahabwa.
Yongeye gusaba ko hashyirwaho Inteko Ishinga Amategeko yigenga igizwe n’abatavuga rumwe n’ubutegetsi, kugira ngo habeho ibiganiro bifatika hagati ya Leta n’abashaka impinduka. Avuga ko ibi bizafasha gutegura neza amatora y’Umukuru w’Igihugu ateganyijwe mu 2027.
Ku rundi ruhande, Komisiyo y’Igenga y’Amatora mu Burundi yavuze ko idafite impungenge z’uko ibura ry’igitoro ryatuma amatora ataba, kuko hari ingamba zirimo gufatwa n’inzego zibishinzwe mu rwego rwo kugikemura.
