Ingabo za Leta ya Repubulika Iharanira Demokarasi ya Congo (FARDC) zasubiye mu mujyi wa Walikale nyuma y’uko abarwanyi ba M23 bari bawufite bawuvuyemo.
Mu ijoro ryo ku wa Gatatu tariki ya 2 Mata 2025, ingabo za M23 ziri muri Walikale-Centre zavuye muri uwo mujyi zisubira inyuma. Iki cyemezo kije gikurikira itangazo ry’uyu mutwe ryari ryasohotse mu kwezi gushize, rigaragaza ko ugiye gukura abarwanyi bawo muri Walikale mu rwego rwo gutanga agahenge no gufungura inzira y’ibiganiro bigamije gukemura amakimbirane ufite na Leta ya Congo.
Amakuru aturuka muri aka gace avuga ko kuri uyu wa Gatatu, ingabo za FARDC zifatanyije n’abarwanyi ba Wazalendo, basubiye muri Walikale ndetse no mu nkengero z’uyu mujyi, zirimo n’ikibuga gito cy’indege cya Kigoma.
Byongeye, bamwe mu baturage bari bahunze imirwano na bo batangiye gutahuka nyuma y’uko umutekano utangiye kugaruka.
Ku wa 22 Werurwe 2025, umutwe wa M23 wari wigaruriye Walikale nyuma yo kuhambura ingabo za Leta ya Kinshasa. Uyu mutwe nturagira icyo utangaza ku kuba ingabo za FARDC zigarutse muri uyu mujyi nyuma yo kuwuvamo.
