Thomas Lubanga, wahoze ari umuyobozi w’umutwe w’inyeshyamba muri Repubulika Iharanira Demokarasi ya Congo (RDC), yongeye kuvugwa nyuma yo gushinga umutwe witwaje intwaro witwa Convention Pour la Révolution Populair (CRP).
Uyu mugabo w’imyaka 64, wamamaye cyane ubwo yacirwaga urubanza n’Urukiko Mpuzamahanga Mpanabyaha (ICC) i La Haye mu 2012, yahamijwe ibyaha byo kwinjiza abana mu gisirikare maze akatirwa gufungwa imyaka 14. Yafunguwe mu 2020 nyuma yo kurangiza igifungo.
Nyuma yo kuva muri gereza, Lubanga yagizwe umuyobozi wa Task Force y’amahoro, ubwiyunge no kubaka Ituri, itsinda ryashyizweho na Perezida Félix Tshisekedi mu rwego rwo gukemura amakimbirane muri ako gace. Icyakora, mu 2022 yashimuswe n’umutwe wa CODECO ari kumwe na bagenzi be, ariko barekurwa nyuma y’amezi abiri.
Mu 2023, Lubanga yatsindiye umwanya w’umudepite mu ntara ya Ituri, ariko Komisiyo y’amatora imwambura insinzi ivuga ko umuntu wahamijwe ibyaha atagomba gutorwa. Mu 2024, yahungiye muri Uganda, aho bivugwa ko ariho akorera ibikorwa bye.
Igisirikare cya RDC cyatangaje ko Lubanga n’abo bafatanyije bashinze umutwe wa CRP bafite ibirindiro muri Uganda kandi bafitanye imikoranire n’inyeshyamba za M23. Ibi byahakanywe na Charles Kakuni, umwungirije muri CRP, uvuga ko badafatanyije na M23. CRP ifite igisirikare cyayo cyitwa Force Pour la Révolution Populair (FRP), nubwo bivugwa ko kitaratangira ibikorwa bya gisirikare muri RDC.
Abasesenguzi bavuga ko uyu mutwe wa Lubanga ushobora kugira ingufu, cyane ko uyu mugabo azwi cyane mu ntara ya Ituri kandi afite amateka maremare mu mitwe yitwaje intwaro.
Lubanga ni umugabo ufite abana barindwi n’umugore umwe.
