Nyuma gutsinda Espanyol ibitego 2-0, Ikipe ya FC Barcelona yegukanye Igikombe cya Shampiyona y’Icyiciro cya Mbere muri Espagne (La Liga) ku nshuro ya 28.
Wari umukino w’umunsi wa 36 wa Shampiyona wabaye mu ijoro ryo ku wa Kane tariki ya 15 Gicurasi 2025 ku isaha ya 21:30 ku kibuga RCDE Stadium.
Ni umukino FC Barcelona yagiye gukina icyo isabwa cyonyine ari ugutsinda ikegukana igikombe habura imikino ibiri ngo Shampiyona y’umwaka wa 2024/2025 isozwe.
Igice cya mbere cyarangiye amakipe yombi anganya ubusa ku busa, maze mu igice cya kabiri, FC Barcelona igarukana imbaraga, maze ku munota wa 53’ Lamine Yamal afungura amazamu ku ishoti rikomeye yatereye hanze y’urubuga rw’amahina.
Igitego gihamya guterura igikombe cya 28, cyatsinzwe na Fermín López ku munota wa 95, ku mupira mwiza yari ahawe na Lamine Yamal. Maze umukino urangira FC Barcelona itsinze Espanyol ibitego 2-0, ihita yegukanye Shampiyona ku nshuro ya 28 mu mateka yayo.
Ni ukuvuga ko itwaye igikombeifite amanota 85 irusha Real Madrid ya kabiri amanota arindwi mu gihe hasigaye imikino ibiri ngo Shampiyona igere ku musozo. Iki ni ikgikombe icya gatatu FC Barcelona yegukanye muri uyu mwaka, nyuma yo kwibikaho Super Coupe na Copa de Rey.
