Umutoza wa Fenerbahçe, José Mourinho, yongeye kuvugisha benshi nyuma yo gusagarira Okan Buruk, umutoza wa Galatasaray, amukurura izuru bikamuviramo kugwa hasi.
Ibi byabaye ku wa Gatatu nyuma y’umukino wa ¼ cy’igikombe cy’igihugu cya Turikiya, aho Galatasaray yatsinze Fenerbahçe ibitego 2-1 kuri Sukru Saracoglu Stadium.
Ubwo abatoza bombi bari mu kibuga baganira n’abasifuzi, Mourinho yegereye Buruk amuturutse inyuma, amukurura izuru, bituma uyu mutoza agwa hasi apfukishije intoki mu maso.
Metin Öztürk, Visi Perezida wa Galatasaray, yamaganye ibyo Mourinho yakoze, avuga ko ari imyitwarire idakwiriye.
Ati: “Umutoza wacu Okan na Mourinho bashimiye abasifuzi, nyuma Mourinho amusagarira mu magambo maze amukoraho. Ni hehe yakora ibi bintu? Turikiya ayibona gute? Ndizera ko ubuyobozi bwa Fenerbahçe buzamufatira ibihano mbere y’uko federasiyo ibikora.”
Buruk, wakiniye Galatasaray mbere yo kuyisubiramo nk’umutoza mu 2022, yirinze kuvuga byinshi kuri iki kibazo.
Ati: “Nta kibazo gikomeye kiri hagati yanjye na Mourinho. Yankuruye izuru anturutse inyuma, ariko ntabwo cyari igikorwa gikwiye. Mu bihe nk’ibi, abatoza bagomba kwitwara neza. Sinshaka gukomeza kuvuga kuri iki kibazo, ariko si imyitwarire iboneye.”
Uyu mukino wari urimo ubushyamirane bukomeye, ndetse Mert Hakan Yandaş wa Fenerbahçe hamwe na Kerem Demirbay na Barış Yilmaz ba Galatasaray bose bahawe amakarita atukura mu minota y’inyongera.
Mourinho si ubwa mbere avuzweho imyitwarire nk’iyi. Nyuma yo kunganya na Galatasaray muri shampiyona mu kwezi kwa Gashyantare, iyi kipe yashinje Mourinho kuvuga amagambo arimo irondaruhu, bituma ishyirahamwe ry’umupira w’amaguru muri Turikiya rimuhagarika imikino ine rinamuca amande y’ibihumbi 35,1£.
Uyu mutoza w’umunya-Portugal ntiyabyihanganiye, nawe yatanze ikirego ashinja Galatasaray kubangamira uburenganzira bwe.
