Leta y’u Burundi yashinjwe gufunga Elias Niyonkuru usanzwe utavuga rumwe na yo, ibeshya ko imukurikiranyeho ibyaha bifitanye isano n’ubupfumu.
Elias Niyonkuru ni umuturage wo mu gace ka Nyabihanga mu Ntara ya Ngozi, mu majyaruguru y’u Burundi.
Amakuru dukesha itangazamakuru ry’i Burundi avuga ko uyu mugabo yatawe muri yombi ku wa 19 Mata 2025, ashinjwa ubupfumu. Kugeza ubu afungiye kuri kasho y’i Mubuga.
Nubwo Leta y’u Burundi ivuga ko uyu mugabo azira ubupfumu, umuryango we n’abaturanyi be barabihakanye, bavuga ko azira politike.
Amakuru yizewe avuga ko Elias Niyonkuru amaze igihe yaranze kuyoboka CNDD-FDD iri ku butegetsi, kuko ashyigikiye Agathon Rwasa utavuga rumwe n’ubutegetsi bwa Evariste Ndayishimiye.
Abarundi bamaze igihe bashinja Leta yabo kwitwaza ubupfumu mu guta muri yombi abo batavuga rumwe. Mu 2022 hari abayoboke b’ishyaka CNL bafatiwe i Kayanza bashinjwa ubupfumu, ariko nyuma baza kurekurwa kubera kubura ibimenyetso.
Mu 2023 na bwo hafunzwe umucuruzikazi wo muri Makamba na we ashinjwa ubupfumu no kuroga, nyuma yo kugaragaza ruswa yari mu nzego za Leta.
