Ishami ry’Umuryango w’Abibumbye ryita ku Buzima (OMS) ryaburiye ibihugu ko bikwiye kwitegura icyorezo gishya gishobora kwibasira Isi mu gihe cya vuba.
Mu ijambo yavuze ku wa 7 Mata 2025, Umuyobozi wa OMS, Dr. Tedros Adhanom Ghebreyesus, yasabye za Guverinoma kongera ishoramari mu buvuzi no gushyira mu bikorwa amasezerano mpuzamahanga yo kurwanya ibyorezo.
Yagize ati: “Icyorezo gishya gishobora kuza ejo cyangwa mu myaka 20 iri imbere. Ariko kizaza, kandi tugomba kuba twiteguye.”
Yerekanye ko icyorezo gishobora guteza ibibazo bikomeye kuruta intambara, ashimangira ko ishoramari mu buvuzi rihutirwa kurusha irya gisirikare.
OMS yibukije ingaruka za Covid-19, yahitanye abantu miliyoni 20 ku Isi hose, ndetse ikangiza ubukungu ku kigero cya miliyari ibihumbi 10 by’amadolari.
Bill Gates na we aherutse gutanga impuruza, avuga ko icyorezo gishya gishobora kwaduka mu myaka 4 iri imbere, ahaye amahirwe ya 10% ko cyazaba vuba, kandi ko gishobora kuba gikomeye kurushaho.
