Mu karere ka Nyaruguru, haravugwa inkuru ibabaje y’umugabo w’imyaka 55 uherutse gutabwa muri yombi akekwaho icyaha gikomeye cyo gusambanya umwana w’umukobwa w’imyaka 10. Ibi byabereye mu murenge wa Kibeho, mu kagari ka Mpanda, by’umwihariko mu mudugudu wa Munege ku itariki ya 12 Mata 2025.
Amakuru aturuka mu baturage bo muri aka gace avuga ko uyu mugabo asanzwe azwi mu gace, ndetse ngo akunda kujya mu rugo rwa nyirakuru w’uwo mwana. Ku munsi akora icyo cyaha, bivugwa ko yageze mu rugo ahasanga umwana wenyine, maze amushuka amubwira ngo bajyane gutashya inkwi mu ishyamba.
Umwana utari uzi umugambi mubisha yari agiye guhura na wo, yemeye ajyana na we nk’uko abaturage babivuga. Bageze mu ishyamba, uwo mugabo ngo yamusabye kwinjira mu bihuru, amushukashuka agezemo ahita amufata ku ngufu aramusambanya.
Ibyabaye byamenyekanye ubwo nyina w’uwo mwana wari hafi aho yumvaga ijwi ry’umwana arira. Akurikirana aho ijwi ryaturukaga, asanga uwo mugabo amaze kwiruka, maze umwana atangira gusobanura uko byagenze, avuga ko yari agiye gusambanywa n’uwo mugabo wari wamushutse.
Uwo mugabo yahise yihisha, ariko abaturage n’inzego z’umutekano bahise batangira kumushakisha. Yaje gufatwa mu gicuku ahagana saa yine z’ijoro, agerageza kwihisha mu gace nyir’izina aho yari yakoreye icyaha.
Umuyobozi w’Akarere ka Nyaruguru, Dr. Murwanashyaka Emmanuel, yemeje ifatwa ry’ukekwaho icyaha, avuga ko ubu afungiye kuri sitasiyo ya RIB ya Kibeho, mu gihe iperereza rikomeje.
Dr. Murwanashyaka yagize ati: “Ni igikorwa cy’agahomamunwa cyabaye, ariko dushimira abaturage batanze amakuru hakiri kare. Ucyekwaho icyaha yafashwe, ubu ari mu maboko ya RIB, kandi tuzakomeza gukurikirana ko ubutabera bukora akazi kabwo.”
Umwana wahohotewe yahise ajyanwa kwa muganga kugira ngo ahabwe ubufasha bw’ibanze mu rwego rw’ubuvuzi ndetse no gukurikirana ubuzima bwe bw’ihungabana.
Inzego z’ubuyobozi n’iz’umutekano zisaba abaturage gukomeza kugira uruhare mu gutanga amakuru y’ibyaha nk’ibi, no kurinda abana babo mu bihe byose, kuko ihohoterwa rikorerwa abana rikomeje gufata indi ntera mu bice bitandukanye by’igihugu.
Ibi bibaye mu gihe hirya no hino mu gihugu hakomeje gushyirwa imbaraga mu kurwanya ihohoterwa rishingiye ku gitsina, by’umwihariko rikorerwa abana. Ubuyobozi burasaba buri wese kugira uruhare mu kubungabunga uburenganzira bwabo no kubarinda ibibahungabanya.
